ملخص الموضوع ان جه اخبارية باشتعال

قفلت ومعدل دقات قلبي فعليا وصل ١٥٠... الست دي عرفت منين... هل راحت الشقة مثلا وتخيلت اللي حصل..

هل اخوها اعترفلها... ولا ايه بالظبط....

نزلت ركبت عربيتي وطلعت علي ٦ اكتوبر...

أخدت العنوان في الطريق من المباحث وعرفتهم اني رايح...

علي باب الشقة اللي في الدور الاول علوي... قابلت طقم الحراسة... كان أول سؤال سألته... هو فيه حد جه دخل الشقة.. قال لا يا ريس محدش دخل غير المباحث والنيابة.... - متأكد؟..

- طبعا يا ريس ممنوع حد من الاهالي يدخلها اصلا ولسه بالشمع الاحمر اهو...

اتأكدت من الختم ع الشمع.. فكيته ودخلت...

ريحة الدخان واللحم المحترق لسه في كل مكان...

دخلت اول غرفة متفحمة.. الغرفة التانية نصها بس المتفحم..

واضح ان دي اللي كان فيها الاطفال... واضح من اللعب الموجودة ع الارض... الغرفة التالتة غرفة نوم الأم...

الدولاب مفتوح... واضح ان فيه درج مكسور...

و امين الشرطة قالي انهم اخدوا علبة المجوهرات والفازة يمكن يلاقو بصمات رغم ان تلات ارباعهم محروق...

دخلت المطبخ... تفحم كامل... تركيزي علي حاجة واحدة بس... شباك المنور... لقيته متفحم...

وقفت علي حاجة فتحته... بيبص علي المنور...

المسافة للأرض حوالي ٦ متر... صعب شوية النط منها لكن ممكن والشباك واسع يخرج حد بمنتهي السهولة...

مشيت أكتر ارتباكًا من قبل ما اجي...

ازاي واحدة تشوف في حلم طريقة قتل أولادها وبالدقة دي... بالتفصيل ده..

رجعت المكتب... طلبت غدا واكلت... الساعة اربعة العصر تقريبا لقيت اتصال من اسلام بيه.... قالي بسخرية... ام مين يا دكتور اللي جاتلك...

قولتله ام ٤٤... ليه... قاللي كنا بعتنا خطاب لبعثة الحج عشان يهتموا اهتمام مضاعف بالست دي للظروف اللي بتمر بيها

و اخطارنا بموعد رجوعها... جالنا فاكس حالا... ان الست دخلت في انهيار عصبي ليلة الجمعة فور علمها بالخبر ودخلت مستشفي سعودي وتوفيت الجمعة بعد الضهر...

و تم انهاء الإجراءات وحجز شحن الجثمان اللي هيوصل للمطار النهاردة الساعة اتناشر بالليل وهيطلع عندكوا ع المشرحة عشان تعملولها شهادة وفاة....

سكت... وبعدين قولتله... اكيد حد قريبهم وقال انه أمهم... قفلت وانا في حالة صد@مة.. وبحاول اقنع نفسي باستماتة ان اللي جت قريبتهم.. شوية تفكير.. اتصلت تاني باسلام بيه... قولتله معلش اديني الاسم والرقم القومي بتاع الام كده... قاللي يا عم بقولك ماتت في السعودية... قولتله معلش... اداني الرقم والاسم... اتحركت علي الامن قابلوني بترحاب جميل... نورت الإدارة يا ريس... سألت مين كان هنا لما الست جاتلي امبارح الساعة ٩ بالليل... قالو محمود وعصام... طب هاتوا كشف الدخول.. دورت في كشف الدخول علي المعادين اللي الست جت فيهم....

اي حد بيدخل بيتاخد إثبات شخصيته ويتثبت بياناته....

الاحد عصرا...... الاسم والرقم القومي متاخدين من جواز سفرها ومتطابقين تماما... الأحد ليلا.... الاسم والرقم القومي متاخدين من نفس الجواز متطابقين تماما...

مشيت مش مركز اطلاقا... وبحاول أقنع نفسي ان حد قريبها هو اللي كان معاه باسبورها ودخل بيه... بس باسبورها ازاي وهيا مسافرة وأكيد جواز سفرها معاها...

هتجنن..... طلعت علي المكتب... طلبت قهوة...

أم عاطف الست الجميلة جاية بتضحك... وبتقول ايه يا دكتور محمد هيا الست اللي كانت عندك دي بتحط ايه...