الشقه الجديده
لكن الغريب اني لما فتحت باب اوضتي وخرجت كانت الشقه مضلمه وكل اللمبات مكسوره وشباك الصالة مفتوح وكل دا كنت متوقعه لكن الغريب اني مالقيتش نور طالع من الحمام فمشيت ناحيته بالراحه ومجرد ما بصيت فيه لقيت البنت الصغيره واقفه فيدنص الحمام زي ما وصف جاري بالظبط خيال اسود شبه شفاف متكممه ومدبوحه ودم اسود سايل على جسمها لكن كانت عينيها بتلمع في الضلمه وكأنها بتبتسم،،
فاتراجعت لورا خطوة وانا مذعور لقيتها اختفت لما سمعت صوت خبط ع الباب
كانوا الجيران جايين على صوت الصريخ
ففوقت من صدمتي وفتحت لهم فكانوا مستغربين ان الامر عدى عندي من غير نار
لكن انا من جوايا ماكنتش حاسس ان الموضوع عندي خلص زي ما كانوا هم فاكرين
دا ممكن يكون لسه بيبدأ
بعدها ركبوا معايا اللمبات اللي كنت مجهزها ونورنا البيت
ومر يوم والتاني وماكانش في اي حاجه غريبه لدرجة اني ظنيت ان الموضوع عدى خلاص..
لكن في الليله التالته صحيت في نص الليل،،
كنت رايح الحمام فمريت على غرفة بسنت لقيت الاباجوره اللي بتنام على نورها مطفيه
فاتسحبت بالراحه وقيدت الاباجوره فلقيت بسنت صحيت وبتقول- اطفيها يا بابا اطفيها
الغريب ان بسنت عمرها ما كانت بتعرف تنام في الضلمه لوحدها ابدا فقلت لها = وهتنامي في الضلمه ؟؟
-اه انا بحب انام في الضلمه
= فطفيت نور الاباجوره ومددت جمب بسنت عشان اطمن عليها
فلقيتها بتقول برزانه غريبه عليها وهي نايمه في حضني
-هو مين اللي مربي كلبين في العمارة بتاعتنا يا بابا؟؟
=كلبين!!! ماحدش هنا مربي كلاب يا حبيبتي
-أمال الكلبين اللي بشوفهم دول بتوع مين
=بتشوفيهم فين وأمتى يا بسنت
-بشوفهم بقالي ليلتين هنا ماشيين في الشقه وبعدين بيدخلوا الحمام...
ساعتها كنت بحاول اقنع نفسي انها تخاريف واوهام من اللي بيشوفها الاطفال خاصة ان بسنت لسه عندها خمس سنين وياما كانت بتحكي عن حاجات زي كده في شقتنا القديمه فقلت لها
=طب وانتي ما بتخافيش منهم يا بسنت
-لا ما هم مابيشوفنيش انا بس اللي بشوفهم
=والكلاب دي شكلها ايه يا حبيبتي
-هما كبار وفروهم كثيف وعينيهم واسعه مش زي بقية الكلاب اللي بنشوفها
فدار في بالي ساعتها انهم ذئبين مش كلبين فسألتها
=وبتشوفي ايه كمان؟؟
ساعتها بسنت قامت من رقدتها في حضني نص قومه وبصت ناحية ركن أوضتها اللي ورا ضهري وابتسمت وقالت
-لا ما بشوفش حاجه تانيه،، هي اصلا ما بتتكلمش...
فلفيت راسي وبصيت ورايا فماشوفتش حاجه فنورت الاباجوره واتعدلت في قعدتي وقلت بجديه
=هي مين اللي مابتتكلمش؟؟
-اه هي ما بتتكلمش،، بس هي اللي بتوريني كل حاجه لما تلعب بصوابعها في شعري فبشوف الكلاب لما بتظهر في الصاله،، وبشوفهم وهم بياكلوا الحمامه الصغيره في الحمام بتاعنا وبعد كده بيمشوا تاني وهي اللي عطتني الهديه دي وشاورت على بقعه سوده صغيره وشبه مدوره على كتفها كانت زي وشم صغير يمكن قطره حوالي تلاته سنتي
ساعتها حسيت برعشه بتسري في جسمي وحضنت بسنت وقلت لها =طب نامي يا بابا والصباح رباح
وهديت نور الاباجوره للحد الادنى وحاولت انام جنبها وانا قلقان جدا من البقعه اللي ظهرت في كتفها ومن الكلام اللي بتحكيه..
لكن مجرد ما غمضت عيني حسيت ان شباك أوضه بسنت اترزع فجأه فاتنفضت من مكاني وقمت قعدت ع السرير فلقيت دخان متوسط الكثافه داخل من الشباك وبدأ يملى الأوضه وظهر القمر قدامي في السما من طاقة الشباك،، كان شبه مدور لان البدر كان عدى عليه تلات ايام لكن الغريب ان تدويرته كانت زي تدويرة البقعه اللي في كتف بسنت ولقيته بعدها بيختفي من مرمى رؤيتي والصبح بيطلع،، بعدها بييجي الليل ويظهر القمر تاني لكن حجمه اصغر من الليله اللي قبلها،،
وقعدت تدور الايام ووراها الليالي وكل ليله القمر حجمه يصغر اكتر
